ബാല്യ വിവാഹം-സുഹ്‌റ പടിപ്പുര

സുഹ്‌റ പടിപ്പുര 

ബാല്യ വിവാഹം

കൈപിടിച്ചേൽപ്പിച്ചപ്പോൾ 

കൈവിട്ടുപോയത്‌ 

എന്റെ ബാല്യമായിരുന്നു.... 

പതിനഞ്ചിനെ പട്ടിൽ -പൊതിഞ്ഞപ്പോൾ, 

പട്ടടയിലേക്കെടുത്തത് -

എന്റെ മോഹങ്ങളാണ്...... 

മൈലാഞ്ചിച്ചോപ്പിൽമങ്ങിപ്പോയത് 

എന്റെ ഉള്ളിലെ കിനാവുകളാണ്... 

മണിയറയിൽ മരിച്ചു വീണത് 

എന്റെ മനസ്സായിരുന്നു.... 

കണ്ണീരിൽ കുതിർന്ന-

പൊന്നിനോടൊപ്പം 

ഉരുകിപ്പോയത് എന്റെ -

പ്രതീക്ഷകളാണ്.... 

നാലുചുമരുകൾക്കുള്ളിൽ 

കരിപിടിച്ചു കറുത്തുപോയത് 

എന്റെ സ്വപ്നങ്ങളാണ്..... 

ഇപ്പോഴും ഞാൻ ഊതി പുകക്കുന്നത് 

എന്റെ ജീവിതമാണ്... .!!

സുഹ്‌റ പടിപ്പുര