എന്തിനു നാം രണ്ടായി :സ്‌ത്രീ-പുരുഷ സമത്വം ,ഒരവലോകനം-റോബിൻ.കെ.ജോർജ്

റോബിൻ.കെ.ജോർജ്

കൊല്ലം ജില്ലയിൽ കുന്നത്തൂർ താലൂക്കിൽ  പടിഞ്ഞാറെകല്ലട എന്ന ഗ്രാമത്തിൽ 1986 ൽ ജനനം

ഒന്നു മുതൽ പന്ത്രണ്ടാം ക്ലാസ് വരെ , ഗ്രാമത്തിലെ സർക്കാർ സ്കൂളുകളിൽ പഠിച്ചു. തുടർന്നു ഇംഗ്ലീഷ് സാഹിത്യത്തിൽ ബിരുദം,ബിരുദാനന്തര ബിരുദം, ബി.എഡ് എന്നിവ നേടി. ഇപ്പോൾ ഇംഗ്ലീഷ് ഭാഷാ പരിശീലകനായി ജോലി ചെയ്യുന്നു.

എന്തിനു നാം രണ്ടായി :സ്‌ത്രീ-പുരുഷ സമത്വം ,ഒരവലോകനം 

സ്ത്രീകൾ ശക്തരായിക്കൊണ്ടിരിക്കുന്നു . കുടുംബത്തിന്റെ ഭാരം തന്റെയും കൂടെ ചുമലിലേയ്ക്കെടുക്കാൻ അവൾ ഇന്നു സജ്ജമായിരിക്കുന്നു . രാത്രി വൈകിയും, ട്രെയിനിലും ബസിലും അവൾ സഞ്ചരിക്കുന്നു .ചിലപ്പോൾ കൂട്ടത്തിൽ, മറ്റു ചിലപ്പോൾ ഒറ്റയ്ക്ക്. കുറച്ച് വർഷം മുമ്പു വരെ, ജോലി കഴിഞ്ഞു വരുന്ന പുരുഷനെ കാത്തു സ്ത്രീ പൂമുഖത്തു നിൽക്കാറുണ്ടായിരുന്നു. ഭർത്താവിന്റെ വരവിനു വേണ്ടി ഭാര്യ, അല്ലെങ്കിൽ അച്ഛനു വേണ്ടി അമ്മയും മക്കളും, അതുമല്ലെങ്കിൽ മകനെ പ്രതീക്ഷിച്ചിരിക്കുന്ന മാതാപിതാക്കളോ, പൊന്നാങ്ങളെയെ കാത്തിരിക്കുന്ന പെങ്ങളോ ഒക്കെ ഒരു സാധാരണ കുടുംബചിത്രമായിരുന്നു. ഈ ചിത്രത്തിനു മാറ്റം വന്നിരിക്കുന്നു . ഒരു കൂട്ടിച്ചേർക്കൽ അടുത്ത കാലങ്ങളായി നാം കാണുന്നുണ്ട്.അതുകൊണ്ടുതന്നെ ഈ ചിത്രം മാറ്റി വരയ്ക്കണം.

സന്ധ്യ കഴിഞ്ഞ് ഭാര്യയെ കൊണ്ടുവരാൻ റെയിൽവേ സ്‌റ്റേഷനിലേയ്ക്കോ, ബസ്സ്റ്റോപ്പിലേയ്ക്കോ വണ്ടിയുമായി കിതയ്ക്കുന്ന ഭർത്താവ്, അമ്മയെ വിളിക്കാൻ ബൈക്കുമായോ കാറുമായോ വരുന്ന മകൻ അതുമല്ലെങ്കിൽ സഹോദരിയെ കാത്തു സഹോദരൻ. ഇനി സ്വന്തമായി ഇരുചക്രം ഓടിക്കാനറിയുമെങ്കിലും, രാത്രി രണ്ടാം യാമത്തിലേയ്ക്ക് എത്തിയ കാരണം അവൾക്കു സംരക്ഷണമായി പിറകെ വണ്ടിയുമായി വരുന്ന സംരക്ഷകൻ. ഈ മാറ്റം ആഴത്തിൽ അംഗീകരിക്കപ്പെടാൻ പറ്റാതെ നിൽക്കുന്ന ഒരു പുരുഷ ബോധം ഇപ്പോഴും നിലനിൽക്കുന്നുണ്ടെന്നുള്ളത് ഒരു വസ്തുത ആണ്. ആയതിനാൽ

സാമൂഹിക ഘടനയിലുണ്ടായ മാറ്റം സ്ത്രീയും പുരുഷനും ഒരു പോലെ അറിയണം, മനസ്സിലാക്കണം.

ഇനി ഇതിലെല്ലാം പെടാത്ത ഒരു പ്രത്യേക വിഭാഗം അംഗനമാരുണ്ട്. ഒറ്റയ്ക്കു ഇടവഴിയിലൂടെ നടക്കേണ്ടി വരുന്ന, ആളൊഴിഞ്ഞ ബസിലും ട്രെയിനിലും യാത്ര ചെയ്യേണ്ടി വരുന്ന, ഭയത്തിന്റെ ഭാരം ഇടനെഞ്ചിൽ വഹിക്കുന്ന ആലംബഹീനയായ സ്ത്രീകൾ. അവരും രണ്ടറ്റം കൂട്ടിമുട്ടിക്കാൻ ബദ്ധപ്പെടുന്നവരാണ്. അവർക്ക് സംരക്ഷണം ആര് കൊടുക്കും? അല്ല ,തന്റെ പുരുഷന്റെ കൂടെയായിരുന്നാലും, സംഘടിക്കപ്പെട്ട ഒരു എതിർപ്പു വന്നാൽ അവൾ നിർഭയയായിരിക്കുമോ ? ഇവിടുത്തെ നിയമം കൃത്യസമയത്ത് ഇടപെടുമോ? നിയമവും കാക്കിയും നോക്കു കുത്തിയായി നിൽക്കുന്നതാണ് നാം പലപ്പോഴും കാണുന്നത് .

കുറേക്കൂടെ അടിത്തട്ടിലോട്ടു പോയാൽ ചിത്രം വീണ്ടും മാറ്റി വരയ്ക്കേണ്ടി വരും. സ്കൂൾ മാഷുമാർ പീഡിപ്പിക്കുന്ന പെൺകുട്ടികൾ. പുരോഹിതനും, പൂജാരിയും, മദ്രസ അദ്ധ്യാപകനും പിച്ചിച്ചീറുന്ന ബാലികമാർ. സ്വന്തം ആൺ സുഹൃത്തിനാൽ ചതിക്കപ്പെടുന്ന കൗമാരക്കാരികൾ, തനിക്കു പൂർണ്ണമായി ആശ്രയിക്കാൻ പറ്റുമെന്ന് വിചാരിച്ച സഹപ്രവർത്തകരാൽ കെണിയിലാക്കപ്പെടുന്ന ഉദ്യോഗസ്ഥമാർ. അതിനേക്കാൾ ഭയാനകവും, ക്രൂരവുമാണ് അച്ഛനാലും ,സഹോദരനാലും വേട്ടയാടപ്പെടുന്നവൾ ; അമ്മാവനാലോ, അകന്ന ബന്ധുവിനാലോ വലയിൽ അകപ്പെടുന്ന അനന്തരവൾ. ഇവരെ ആര് സംരക്ഷിക്കും? ഇത് ഒരു ധർമ്മ സങ്കടത്തിലേയ്ക്കാണ് അവളെ നയിക്കുന്നത്. കാരണം എല്ലാവരെയും സംശയിച്ചു കൊണ്ടു ഒരു സ്ത്രീയ്ക്കും മുന്നോട്ട് പോകാൻ കഴിയില്ല. അതു അവളെ അനാരോഗ്യപരമായ വ്യക്തിത്വത്തിനു അടിമയാക്കും. ഇവിടെയാണു യഥാർത്ഥ ഇടപെടൽ നടക്കേണ്ടത്.

സ്ത്രീ ഒരേ സമയം തന്റെ ശാരീരിക ഘടനയെപ്പറ്റിയും, പുരുഷന്റെ വൈകാരിക മണ്ഡലത്തെപ്പറ്റിയും; പുരുഷൻ അതേ പോലെ തന്റെ വൈകാരികതയും അതിന്റെ മനോഹരവും ,വൈകൃതവുമായ അവസ്ഥയെപ്പറ്റിയും, സ്ത്രീയുടെ ഘടന തന്നിൽ മിന്നൽപിണർ ഉളവാക്കാൻ കഴിവുള്ളതാണെന്നുമുള്ള യാഥാർത്ഥ്യത്തെപ്പറ്റിയും ആഴത്തിൽ ഉറപ്പിക്കണം. ഇത് പുരുഷന്റെ വൈകാരിക ഘടനയുടെ ഭാഗമാണെന്നു സ്ത്രീയും അറിയണം. അപ്പാൾ അടുത്ത ചോദ്യം. അറിഞ്ഞാൽ മാത്രം മതിയോ? ഇതെല്ലാം അറിയുന്ന ഒരാളല്ലേ കൊട്ടിയൂർ സംഭവത്തിലെ പ്രതി. ഇതെല്ലാം അറിയുന്നവരല്ലേ അദ്ധ്യാപകർ . അപ്പോൾ പ്രശ്നം വീണ്ടും ഗുരുതരമാണ്. ഇവിടെ ഒരു പൊളിച്ചെഴുത്ത് അനിവാര്യമായിരിക്കുന്നു.

സ്ത്രീ ,പുരുഷൻ എന്ന ദ്വന്ദ്വത്തിൽ നിന്നു 'മനുഷ്യൻ' എന്ന ഏകത്വത്തിൽ ചിന്തിക്കണം. മനുഷ്യൻ- ആൺ ജാതിയോ, പെൺ ജാതിയോ അതോ ഭിന്ന ജാതിയോ - ലിംഗത്തിനപ്പുറമായി പരസ്പരം ആദരിക്കപ്പെടാൻ, ബഹുമാനിക്കപ്പെടാൻ തുടങ്ങണം. ഒരുവൻ / ഒരുവൾ അനുവാദം കൂടാതെ മറ്റൊരുവന്റെമേൽ ദുഷ്ടലാക്കോടെ കൈ വെക്കരുത്. പൊടുന്നനെ പൊട്ടി മുളയ്ക്കുന്ന  ബന്ധങ്ങളും ,അതിനെ തുടർന്നുള്ള സ്പർശനങ്ങളും വികലമായ വൈകാരിക ഇളക്കമാണെന്നു പരസ്പരം അറിയണം. സ്വയം അറിയുക എന്നുള്ളതാണു ഏറ്റവും പ്രാധാന്യമർഹിക്കുന്നത്.

ഒരിക്കൽ G. K Chesterton എന്ന ചിന്തകനോട് ഒരു പത്രക്കാരൻ ചോദിച്ചു:

സർ ,ഈ ലോകത്തിനെന്താണു കുഴപ്പം? ( Sir,What is wrong with this world ?)

മറുപടി ,ആ പത്രക്കാരനെ ഞെട്ടിച്ചു.

അദ്ദേഹം പറഞ്ഞു ,

"ഞാൻ ആണ് (I am )"

അതെ. കുഴപ്പം നമുക്കാണ്.നമ്മുടെ ദുഷിച്ച ഹൃദയം. ഓരോ മനുഷ്യനും അവന്റെ ഹൃദയത്തെ പഠിക്കാൻ തുടങ്ങിയാൽ അവന്റെയുള്ളിലെ കുപഥ സഞ്ചാരിയെ കണ്ടെത്താൻ കഴിയും. അവിടെയാണു മാറ്റത്തിന്റെ തുടക്കം. വിദ്യാസമ്പന്നനായതുകൊണ്ടോ, ഉയർന്ന ശമ്പളമുള്ളതുകൊണ്ടോ,         മാന്യനായതുകൊണ്ടോ ഒന്നും ആ കെട്ടഴിഞ്ഞ കുതിരയെ മെരുക്കാൻ കഴിയണമെന്നില്ല. ഈ ഗുണ   ങ്ങളുള്ള ഒരു വ്യക്തിയുടെയുള്ളിൽ നിന്നും ഈ മൃഗം പുറത്തുചാടാൻ ഞൊടി നേരം മതി.അതാണു ഏറ്റവും അപകടരമായ അവസ്ഥ. അതേ സമയം സ്ത്രീ പരിപൂർണ്ണയാണെന്ന് മുദ്രയിടപ്പെടുന്നതുമില്ല. അവളും തന്റെയുള്ളിലെ പൈശാചികതയെ തിരിച്ചറിയണം. സ്വന്തം മകളെ മറ്റുള്ളവർക്ക് കാഴ്‌ച വച്ച അമ്മയെപ്പറ്റിയുള്ള ( വളരെ അപൂർവ്വമായിട്ടെങ്കിലും) വാർത്ത നാം കേട്ടിട്ടുണ്ട്. സ്വന്തം മകളെ ഉപേക്ഷിക്കുകയോ, കാമുകനാൽ കൊല്ലപ്പെടുവാൻ സാഹചര്യമൊരുക്കിക്കൊടുക്കുകയോ ചെയ്തിട്ടുള്ള സ്ത്രീകളും ഈ സമൂഹത്തിലുണ്ട്. അപ്പോൾ പ്രശ്നം സങ്കീർണ്ണമല്ലേ? മാനസികമായ ഒരു തലത്തിനപ്പറും ,അവനെക്കൊണ്ട് / അവളെക്കൊണ്ട് ഇത്തരം ഹീന പ്രവർത്തികൾ ചെയ്യിക്കുവാൻ അവനി(ളി)ൽ വ്യാപരിക്കുന്ന ഒരു പ്രേരകശക്തിയുണ്ട്           . വ്യക്തമായി പറഞ്ഞാൽ അവന്റെ(അവളുടെ)യുള്ളിലെ വ്യക്തിത്വത്തെ, മനുഷ്യത്വത്തെ ബലാൽക്കാരേണ അടയ്ക്കപ്പെട്ടിരിക്കുന്നു. ആ സ്ഥാനത്തു അവന്റെ(     അവളുടെ)യുള്ളിൽ വേറൊന്നു പ്രവർത്തിച്ചു കൊണ്ടിരിക്കുന്നു. അങ്ങനെയല്ലെങ്കിൽ, ഒരമ്മയ്ക്കോ അച്ഛനോ സ്വന്തം മകളെ എങ്ങനെ നശിപ്പിക്കാൻ പറ്റും   .   കടിഞ്ഞാൺ പൊട്ടിയ ഒരു മൃഗം എനിയ്ക്ക് പകരം പ്രവർത്തിക്കുന്നുണ്ടെന്ന സത്യം ഓരോ വ്യക്തിയും തിരിച്ചറിഞ്ഞ് ,അതിനെ ജയിക്കാനുള്ള ഒരു ആത്മീയ ബോധം പ്രാപിക്കാൻ കഴിയുന്ന നിമിഷം ,മാറ്റത്തിന്റെ തുടക്കമായി.

സ്‌ത്രീയും പുരുഷനും തന്നേപ്പോലെ സ്വതന്ത്രമായി ചിന്തിക്കാനും, തീരുമാനമെടുക്കാനും അതിലുപരി സ്വയബോധവും ,ആത്മാഭിമാനവും ,സർവ്വോപരി ദൈവത്തിന്റെ സാദൃശ്യമുളള സൗന്ദര്യമുളള മനുഷ്യനാണെന്നു ഓരോരുത്തർക്കും ബോധ്യം വരുന്ന മാത്രയിൽ ബന്ധങ്ങൾ പുനർ നിർവ്വചിക്കപ്പെടും. അപ്പോഴും സ്ത്രീയ്ക്കും പുരുഷനും പരസ്പരം ശാരീരികമായും, മാനസികമായും ,വൈകാരികമായും അടുക്കുവാൻ പ്രകൃതി തന്നെ അനുവദിച്ചിരിക്കുന്ന അനന്തമായ സ്വാതന്ത്ര്യവും, ആ ബന്ധത്തിന്റെ സൗന്ദര്യവും കെടാതെ നിൽക്കും.

എന്തിന് നാം രണ്ടായി സൃഷ്ടിക്കപ്പെട്ടു? നീ പെണ്ണും ,ഞാൻ ആണും.ഓരോ പുരുഷനും, സ്ത്രീയും ഇതിന്റെ ഉത്തരം സ്വതന്ത്രമായ ചിന്തയിലുടെ കണ്ടെത്തട്ടെ...

റോബിൻ.കെ.ജോർജ്

ആ മഴയില്‍ നനഞ്ഞ കൗമാരഭാവങ്ങൾ-പി.എ നൃപൻ ദാസ്

പി.എ നൃപൻ ദാസ് 

തിരുവനന്തപുരം ഗവണ്‍മെന്റ് സെക്രട്ടറിയറ്റിൽ അസിസ്റ്റന്റ് സെക്ഷൻ ഓഫീസർ.ശാസ്താംകോട്ട സ്വദേശി കൊല്ലം ഫാത്തിമ മാതാ നാഷണല്‍ കോളേജ് മുൻ ചെയർമാൻ.

ആ മഴയില്‍ നനഞ്ഞ കൗമാരഭാവങ്ങൾ

"ഞാന്‍ ഗന്ധർവ്വൻ. ചിത്രശലഭമാകാനും മേഘമാലകളാകാനും പാവയാകാനും
പറവയാകാനും മാനാകാനും മനുഷ്യനാകാനും
നിന്റെ ചുണ്ടിലെ മുത്തമാകാനും
ഒരു നിമിഷാർദ്ധം പോലും
വേണ്ടാത്ത ഗഗനചാരി....."

പാലപ്പൂവിന്റെ മണം കാറ്റില്‍ പടരുന്നു.

ചുവരിലെ കലണ്ടറിൽ ജനുവരി 24.

സൂര്യ സ്പർശമുള്ള പകലുകളോടും ചന്ദ്ര സ്പർശമുള്ള രാത്രികളോടും യാത്ര പറഞ്ഞ് ,

മലയാള സിനിമയുടെ ഗന്ധർവ്വൻ യാത്രയായിട്ട് ഇരുപത്താറു സൂര്യവർഷങ്ങൾ.

പദ്മരാജന് മരണമില്ല. ഗന്ധർവ്വൻമാർ ഭൂമിയിലേക്ക് ശിക്ഷിക്കപ്പെടുകയാണ് . ദേവശാപത്തിന്റെ ശിക്ഷയൊടുക്കാൻ വിണ്ണിൽ നിന്നും ഭൂമിയിലേക്കെത്തിയ ഏതോ

ഗന്ധർവ്വ കുമാരനാകണം പത്മരാജൻ .

കലർപ്പില്ലാത്ത കാമനകളുടെ നിത്യോപാസകരും ഒപ്പം വിചിത്ര സ്വഭാവികളുമായ മനുഷ്യരെ സൃഷ്ടിച്ച എഴുത്തുകാരനെ ഒരു ജനത അനുധാവനം ചെയ്യുന്നുണ്ടിവിടെ, ഇപ്പോളും ...

പത്മരാജനോളം ആഘോഷിക്കപ്പെടുകയും , ഒരു ഭ്രാന്ത് പോലെ ആസ്വാദകനെ

മയക്കുകയും ചെയ്ത മറ്റൊരു ലഹരി മലയാള സിനിമ അതിന്റെ ചില്ലു പാത്രത്തില്‍

പകർന്നിട്ടില്ല , നാളിതുവരെ .

എത്ര എഴുതിയാലാണ്

പത്മരാജനെന്ന ജീനിയസിനെപ്പറ്റി

ഒന്ന് പറഞ്ഞ് തുടങ്ങാന്‍ കഴിയുന്നത് ..?

തൂവാനത്തുമ്പികളിൽ കടൽത്തീരത്തെ ഫ്രയിമുകളിൽ പുന്നൂസ് കോണ്‍ട്രാക്ടറും

ക്ളാരയും ...

വലിയ വലിയ ചിരികളുടെ പൊട്ടിച്ചിതറലിൽ സ്ക്രീനിലെ നിറങ്ങൾക്കൊപ്പം , പുന്നൂസ് കോണ്‍ട്രാക്ടർ ജയകൃഷ്ണന്‍ ആയി മാറുന്നു ...

ഒറ്റപ്പുതപ്പിനുള്ളിൽ "പവിഴം പോൽ പവിഴാധരം പോൽ ...." എന്ന് പാടുന്ന സോളമനും സോഫിയയ്ക്കും മുകളിലേക്ക് വന്നു പതിക്കുന്ന മുന്തിരികൾ...

തിര കവർന്നു കൊണ്ടു പോയ ചെറുമകന്റെ തിലോദകമായി കടലിന്റെ ആഴങ്ങളിലേക്ക്

പോയ മൂന്നാം പക്കത്തിലെ മുത്തശ്ശൻ ...

പാത്രക്കടയിലെ അദ്ഭുത ലോകത്തിനും അതിനു പുറത്തെ ആസക്ത

ജീവിതത്തിനുമിടയിൽ പകച്ചു പോയ കള്ളൻ പവിത്രൻ ...

മാളുവമ്മയുടെ വേശ്യപ്പുരയുടെ വിചിത്ര സമസ്യകളിൽ പതറുന്ന 'അരപ്പട്ട കെട്ടിയ

ഗ്രാമത്തിലെ' സക്കറിയയും ഗോപിയും ബിലാലും.

മായയുടെ വിടർന്ന കണ്ണുകളുടെ അടിത്തട്ടിൽ നിന്ന് താന്‍ മാഞ്ഞു പോയിരിക്കുന്നു

എന്നറികെ വിദൂരതയിലേക്ക് ഒറ്റയ്ക്ക് കാറോടിച്ചു മറയുന്ന 'ഇന്നലെ'യിലെ നരേന്ദ്രൻ.

തിര വന്നു മൂടുന്ന കോവളത്തെ വന്യമായ അധോലോകത്തിൽ ഉത്തരം കിട്ടാത്ത

ചോദ്യമായി 'സീസണി'ലെ അങ്കിള്‍ ജീവന്‍ ...

അങ്ങനെ എത്ര എത്ര ഒർമ്മകൾ...

പെരുവഴിയമ്പലവും തൂവാനത്തുമ്പികളും ദേശാടനക്കിളികളും ഇന്നലെയും അരപ്പട്ട

കെട്ടിയ ഗ്രാമത്തിലും ഫയല്‍വാനും സീസണും അപരനും കൂടെവിടെയും

നൊമ്പരത്തിപ്പൂവും നവംബറിന്റെ നഷ്ടവും തിങ്കളാഴ്ച നല്ല ദിവസവും ....

പേരുകള്‍ അവസാനിക്കുന്നില്ല ...

ക്ളാരയും രാധയും സോഫിയും അടക്കമുള്ള സ്ത്രീ കഥാപാത്രങ്ങൾ

പുരുഷന്റെ നിയമങ്ങള്‍ തൊണ്ട തൊടാതെ വിഴുങ്ങുന്നവരായിരുന്നില്ല. അവര്‍

ഗോത്രത്തിന്റെ വിലക്കുകൾക്കു മേൽ സ്ത്രീ സ്വത്വത്തിന്റെ ഉഗ്ര ശക്തിയെ

കാട്ടിക്കൊടുത്തു. ദേശാടനക്കിളികളിൽ രണ്ടു കൂട്ടുകാരികള്‍ തെരുവിന്റെ സ്വാതന്ത്ര്യവഴികളിലേക്കാണ് ഒളിച്ചോടുന്നത്. തൂവാനത്തുമ്പികളിൽ ക്ളാരയുമതേ.

അവളുടെ വഴികൾ അവള്‍ നിശ്ചയിച്ചതാണ്. തന്നെ വഞ്ചിച്ച പുരുഷന്റെ ജീവന്‍ പ്രണയത്തിന്റെ ബലിത്തറയിൽ ഹോമിച്ച് നവംബറിന്റെ നഷ്ടത്തിലെ മീര വേറിട്ട പെണ്ണാകുന്നു. അഴകിലും മിഴിവിലും മാത്രമല്ല അകം നിറയുന്ന സ്വാതന്ത്ര്യേച്ഛയുടെ നുരകളിലും പത്മരാജന്റെ സ്ത്രീകള്‍ പുരുഷനെ മറികടക്കുന്നു.

സദാചാരത്തിന്റെ ശ്രീരാമ സങ്കൽപ്പങ്ങളെ പിന്നിലാക്കിക്കൊണ്ടാണ്, രണ്ടാനച്ഛനാൽ അപമാനിതയായ പെണ്ണിനെ "നിന്റെ ശരീരത്തെ മാത്രമേ അയാള്‍ക്ക് തൊടാൻ കഴിയൂ.. " എന്ന് പറഞ്ഞു കൊണ്ട് ടാങ്കർ ലോറിയിലേക്ക് വിളിച്ചു കയറ്റി ജീവിതത്തിന്റെ മുന്തിരിത്തോപ്പുകളിലേക്ക് ഓടിച്ചു പോകുന്നത്. പീഢിപ്പിക്കപ്പെട്ട പെണ്ണ് അടുത്ത സീനിൽ സ്വന്തം ജീവനൊടുക്കുന്ന സിനിമാ കാഴ്ചകളെ പത്മരാജൻ കീഴ്മേൽ മറിച്ചു. സീതയുടെ സദാചാരത്തിൽ സംശയാലുവായ പുരുഷ രാമന്‍മാരുടെ സദാചാര സംഹിതകൾക്കു മേലെ സോഫിയെ നെഞ്ചോട് ചേര്‍ത്തു പിടിച്ച സോളമന്റെ ടാങ്കർ ലോറി ചീറിപ്പാഞ്ഞു. മോഹന്‍ ലാൽ എന്ന താരശരീരം ഇന്ന് വരെ കാട്ടിയ ഏറ്റവും വലിയ ഹീറോയിസം അതായിരുന്നു.

രതിയും മൃതിയും ആയിരുന്നു പത്മരാജൻ സിനിമകളുടെ ശാരീരം

ഭ്രാന്തും അടങ്ങാത്ത സ്വാതന്ത്ര്യ ബോധവും കെട്ടഴിയുന്ന കഥാപാത്രങ്ങൾ ...

അവര്‍ മനുഷ്യൻ സൃഷ്ടിച്ച നിയമങ്ങളെ ചോദ്യം ചെയ്തു കൊണ്ടേയിരുന്നു ...

ആ മഴയില്‍ നനഞ്ഞ കൗമാര യൗവനങ്ങളും,

അവയുടെ അലയടങ്ങാത്ത സ്മൃതി ലഹരികളും പകർന്ന നിത്യ കാമുകാ ...

അനശ്വര സ്മരണകളുടെ ഈ ചെറു പാനപാത്രം സ്വീകരിച്ചീടുക ...

ചെവിയില്‍ മുഴങ്ങുന്ന ഒന്നു കൂടി മാത്രം പറഞ്ഞ് പൂര്‍ണമായും അപൂര്‍ണമായ ഈ കുറിപ്പ് ഇവിടെ അവസാനിപ്പിക്കട്ടെ ...

"നമുക്ക് ഗ്രാമങ്ങളില് ചെന്ന് രാപ്പാർക്കാം , അതികാലത്ത് എഴുന്നേറ്റ് മുന്തിരിതോട്ടങ്ങളില് പോയി മുന്തിരി വള്ളി തളിർത്തു പൂവിടുകയും, മാതളനാരകം പൂക്കുകയും ചെയ്തോ എന്ന് നോക്കാം, അവിടെ വച്ച് ഞാന് നിനക്കെന്റെ പ്രേമം തരാം...."

പി.എ നൃപൻ ദാസ് 

വെള്ളത്തിനെന്താണ് വില ?-വി.ടി ലത്തീഫ് മാസ്റ്റർ

വി.ടി ലത്തീഫ് മാസ്റ്റർ 

എ.എം.എൽപി.എസ്സ്

വളവന്നൂർ നോർത്ത് 

വെള്ളത്തിനെന്താണ് വില ?

വെള്ളത്തിനെന്താണ് വില ?ലിറ്ററിന് 20 രൂപ നിരക്കിൽ കുപ്പിവെള്ളം നമുക്ക് ലഭിക്കും.എന്നാൽ വെള്ളത്തിന്റെ വില എത്രയാണെന്ന് കണക്കാക്കാൻ നമുക്ക് സാധിക്കുമോ !

പണ്ട് ഒരു രാജാവ് നായാട്ടിനിടയിൽ കാട്ടിനകത്ത്‌ ഒറ്റപെട്ടു . ഏറെ അലഞ്ഞിട്ടും ആരെയും കണ്ടെത്താൻ സാധിച്ചില്ല .ദാഹിച്ചു വലഞ്ഞ രാജാവ് ഒരു തുള്ളി വെള്ളം കിട്ടാതെ തളർന്നു വീണു.അപ്പൊഴാണ് ആ വഴി ഒരു സ്‌ത്രീ  കുടം നിറയെ വെള്ളവുമായി 

വന്നത് .താൻ ഇവിടുത്തെ രാജാവാണെന്നും കുടിക്കാൻ ഒരല്പം വെള്ളം തരണമെന്നും 

ക്ഷീണിച്ച സ്വരത്തിൽ രാജാവ് ആവശ്യപ്പെട്ടു.അത് കേട്ടതും ആ സ്‌ത്രീ തിരിഞ്ഞു നടക്കാൻ തുടങ്ങി .അല്പം വെള്ളത്തിന് പകരമായി രാജ്യത്തിന്റെ പകുതി നൽകാമെന്നു രാജാവ് പറഞ്ഞു.ആ സ്‌ത്രീ കേട്ട ഭാവം പോലും നടിച്ചില്ല .എന്റെ രാജ്യം മുഴുവനും തരാം ,ഒരല്പം വെള്ളം തരൂ രാജാവ് കെഞ്ചി.ആ വാക്കുകൾ അവൾ പരിഗണിച്ചതേയില്ല .

തന്റെ രാജ്യവും എല്ലാ സമ്പാദ്യവും തന്റെ മക്കളെയും തനിക്കുള്ളതെല്ലാം രാജാവ് വാഗ്‌ദാനം ചെയ്തു.ഒടുവിൽ ആ സ്‌ത്രീ ഒരു കവിൾ വെള്ളം രാജാവിന് നൽകി ,എല്ലാം സ്വന്തമാക്കി.രാജാവിനാകട്ടെ തനിക്ക് നഷ്ടപ്പെടുമായിരുന്ന  ജീവൻ തിരിച്ചുകിട്ടിയതിലുള്ള ആശ്വാസമായിരുന്നു.

ഇനി നിങ്ങൾ പറയൂ വെള്ളത്തിന്റെ യഥാർത്ഥ വിലയെന്താണ് ?അത് മനസ്സിലാക്കിയാൽ അറിയാതെപോലും ഒരുതുള്ളി വെള്ളവും നാം പാഴാക്കില്ല.പക്ഷെ ,വെള്ളത്തിന്റെ വില മനസിലാക്കാൻ ,നമുക്ക് ലഭിച്ചുകൊണ്ടിരിക്കുന്ന സമൃദ്ധിയുടെ അവസാന തുള്ളിയും നിലക്കുവാൻ കാത്തിരിക്കുകയാണ് നാം .

നമ്മുടെ നാട് രൂക്ഷമായ ജലക്ഷാമത്തിലേക്കും കൊടിയ വരൾച്ചയിലേക്കും നീങ്ങികൊണ്ടിരിക്കയാണ്.ഭൂമിയുടെ നിറമാറു  തുരന്നു ആഴങ്ങളിൽ നിന്നും നാം ഊറ്റിയെടുത്തുകൊണ്ടിരിക്കുന്ന കണ്ണീരുറവ പോലും വറ്റിക്കൊണ്ടിരിക്കുന്നു    .വസൂരി 

വന്ന സുന്ദരിയുടെ മുഖം പോലെ കുഴൽകിണറുകളാൽ ഭൂമിയുടെ മുഖവും വികൃതമായിരിക്കുന്നു.

നാം അധിവസിക്കുന്ന ഭൂമിയിൽ മുക്കാൽ പങ്കും ജലം കൊണ്ട് മൂടപ്പെട്ടിരിക്കുന്നു .

അതിൽ 97.5 ശതമാനവും ഉപയോഗ യോഗ്യമല്ലാത്ത ഉപ്പുകലർന്ന 

കടൽ വെള്ളമാണ്.ബാക്കി വരുന്ന 2.5 ശതമാനം ശുദ്ധജലത്തിൽ 

1.5 ശതമാനവും നമ്മൾ മലിനമാക്കി കഴിഞ്ഞു .ശേഷിച്ച 1 ശതമാനം മാത്രമാണ് 

ലോകമെമ്പാടുമുള്ള മനുഷ്യർക്കും ജീവജാലങ്ങൾക്കും  ജീവജലമായുള്ളതു.

അതുകൊണ്ടുതന്നെ നാം പാഴാക്കുന്ന ഓരോ തുള്ളിയും മറ്റ്‌  മനുഷ്യരുടെയോ  ജീവജാലങ്ങടെയോ ജീവവനാശത്തിനു കാരണമാകുമെന്ന് നാം തിരിച്ചറിയുക .

ഇനി ഓരോ തുള്ളി പാഴാക്കുമ്പോഴും ജീവജലം ലഭിക്കാതെ പിടഞ്ഞു മരിച്ച 

പിഞ്ചു പൈതങ്ങളുടെ മെലിഞൊടിഞ്ഞ രൂപം നാം മനസ്സിലോർക്കുക .

നാമൊക്കെ എത്ര അനുഗ്രഹീതർ.ഒരു തുള്ളി വെള്ളം കുടിക്കാനില്ലാതെ പശു മൂത്രമൊഴിക്കുന്നതും നോക്കി ഒരു പാത്രവും പിടിച്ചു പിന്നാലെ നടക്കുന്ന ആഫ്രിക്കൻ ബാലന്റെ ഗതി നമ്മുടെ മക്കൾക്ക് വന്നിട്ടില്ല.യുദ്ധക്കെടുതിയിൽ ഭക്ഷണവും വെള്ളവും 

ലഭിക്കാതെ ദിവസങ്ങളോളം പച്ചിലനീർ പിഴിഞ്ഞ് കുടിച്ചു ജീവൻ നിലനിർത്തിയ  സിറിയൻ അഭയാർത്ഥി ബാലന്റെ ദുരവസ്ഥ നമ്മുടെ മക്കൾക്കുണ്ടായിട്ടില്ല.പക്ഷെ ,

സൂക്ഷിക്കുക .സമീപഭാവിയിൽ നമ്മളിൽ ചിലരെങ്കിലും അതിനു സമാനമായ അവസ്ഥയിൽ എത്തിയേക്കാമെന്ന സൂചനയാണ് ഈ വർഷത്തെ വരൾച്ച നമുക്ക് നൽകുന്ന പാഠം.

അതുകൊണ്ട് മനുഷ്യാ ...അഹങ്കാരം വെടിഞ്ഞു നീ വിനയാന്വിതനാവുക.    ഈ വേനൽക്കാലം ജൂൺ മാസത്തേക്ക്‌ കൂടി ദീർഘിച്ചാൽ തീരാവുന്നതേയുള്ളൂ നിന്റെ

പൊങ്ങച്ചം.നാം ഉപയോഗിക്കുന്ന ഓരോ തുള്ളി വെള്ളത്തിനും ഭൂമിയിൽ ഒട്ടനേകം 

അവകാശികൾ ഉണ്ടെന്ന ബോധത്തോടെ ചിലവഴിക്കുക        . വെള്ളത്തിന്റെ വില നാം മനസിലാക്കുക.അല്ലാത്ത പക്ഷം "വെള്ളം കിട്ടാതെ ഞരമ്പ് വലിഞ്ഞു മുറുകി 

ശ്വാസം കിട്ടാതെ പിടഞ്ഞു മരിക്കുന്നവരുടെ കൂട്ടത്തിൽ  

നമ്മുടെ നാട്ടിൽ നിന്നും ചിലരുടെ പേരെങ്കിലും എഴുതിചേർക്കേണ്ടിവരും"

"നാമോരോരുത്തരും കരുതി വയ്ക്കുക ,ഈ സമൃദ്ധി  നമുക്കും      ,വരും തലമുറക്കും വേണ്ടി"

വി.ടി ലത്തീഫ് മാസ്റ്റർ