പ്രണയ ഭാഷ്യങ്ങൾ -സാബു ചോലയിൽ

സാബു ചോലയിൽ

പ്രണയ ഭാഷ്യങ്ങൾ 

പുലർ യാമത്തിലെ സ്വപ്നത്തിൽ വന്ന 

ഏഴു ചിറകുള്ള മാലാഖയുടെ 

നറു പുഞ്ചിരിയല്ലേ പ്രണയം .

ഉൾക്കാമ്പില്ലാത്ത ഇഷ്ടങ്ങളുടെ
 പുറന്തൊലികളിൽ 

കാലം തേച്ചു പിടിപ്പിച്ച 

വർണ്ണങ്ങളല്ലേ പ്രണയം .

വിണ്ടുണങ്ങിയ മൺകട്ടകൾ 

മരിച്ചു കിടക്കുന്ന 

പാട വരമ്പിലെ 

തൊട്ടാവാടിപ്പൂക്കളല്ലേ

പ്രണയം .

ചൊല്ലിപ്പതം വന്ന 

കഥാ ഗതികളിൽ

പൊട്ടിപ്പുറപ്പെട്ട 

കലാപമല്ലേ പ്രണയം .

ഇന്നലെകളുടെ

പഞ്ഞങ്ങളിൽ പെയ്ത 

ചെറുമഴയിൽ മുളച്ച 

വെൺ കൂണല്ലേ പ്രണയം .

മരണമെന്ന ശാന്തതയ്ക്കപ്പുറവും 

വിടർന്നു നിൽക്കുന്ന

നിത്യ കല്യാണിയല്ലേ പ്രണയം .

നീയെന്ന ഇസത്തിൽ നിന്ന്

ഞാനെന്ന 

പ്രത്യയ ശാസ്ത്രത്തിലേയ്ക്ക് 

അദൃശ്യമായി വരച്ചിട്ട 

ഹൃദയ രേഖയല്ലേ പ്രണയം

സാബു ചോലയിൽ