മക്കളറിയാൻ-സുഹറ പടിപ്പുര

സുഹ്‌റ പടിപ്പുര 

മലപ്പുറം- കാളികാവ് സ്വദേശി 

അടക്കാക്കുണ്ട് ക്രസന്റ് 

ഹയർസെക്കണ്ടറി സ്‌കൂൾ അദ്ധ്യാപിക. 

ഭർത്താവ് :അബ്‌ദുൾ ഷുക്കൂർ (അധ്യാപകൻ) 

മകൾ :ഹിബ ഫെബിൻ

മക്കളറിയാൻ

ഇരുണ്ട് -മെലിഞ്ഞ് 

ചുക്കിച്ചുളിഞ്ഞ ഒരമ്മയെ 

വീണുകിട്ടിയിട്ടുണ്ട്.... 

ഏകദേശം എൺപത്-

വയസ് പ്രായംതോന്നിക്കും ചലമൊലിക്കുന്ന -

വ്രണങ്ങൾകൊണ്ടാകാം 

മുടന്തിയാണ് നടപ്പ് 

വളരെകുറച്ചേ-

സംസാരിക്കൂ.... 

മക്കളെകുറിച്ചു ചോദിക്കുമ്പോൾ മാത്രം 

കേൾവിക്കുറവുണ്ട്... 

എങ്കിലും -

നാലഞ്ചെണ്ണത്തിനെ- 

യെങ്കിലും ചുമന്നുപെറ്റതാണെന്ന് 

ചുളിഞ്ഞുതൂങ്ങിയവയറും 

മാറിടവും വിളിച്ചു- പറയുന്നുണ്ട്... 

പ്രതീക്ഷയുടെ വെളിച്ചം

കെട്ടതെങ്കിലും -കണ്ണുകൾ

ആൾക്കൂട്ടത്തിൽ ആരെയോ വൃഥാ -

തിരയുന്നുണ്ട് ... 

മുഷിഞ്ഞുനാറുന്ന ഭാണ്ഡത്തിൽ ഇടയ്ക്കിടെ 

എന്തോ പരതുന്നുണ്ട് -

ഒരുപക്ഷെ ;

നടതള്ളിയതറിഞ്ഞപ്പോൾ

മറന്നുവച്ച

മനസ്സായിരിക്കാം... 

കണ്ടെത്തി-

ഏൽപ്പിക്കാനല്ല 

അമ്മയെ വട്ടംപിടിച്ചു വാശിയോടെ-

കരഞ്ഞിരുന്ന മക്കളറിയാൻവേണ്ടി-

മാത്രം... 

പൂപ്പൽപിടിച്ചൊരുപാക്കറ്റ്  അരിമുറുക്ക് 

ഇപ്പോഴും നിങ്ങളെ -

കാത്തിരിപ്പുണ്ട് ;

ചീഞ്ഞു നാറുന്ന- ഭാണ്ഡത്തിനുള്ളിൽ.... !!

സുഹറ പടിപ്പുര