രാത്രി മാത്രം തുറക്കുന്ന വഴി-സജദില്‍ മുജീബ്

സജദില്‍ മുജീബ്

രാത്രി മാത്രം തുറക്കുന്ന വഴി

വീട് അപ്പുവിന് അമ്മയെ പോലെയാണ്.. മഴ പെയ്യുമ്പോള്‍ അവന്‍ മഴയില്‍ 

കുളിച്ച് നില്‍ക്കുന്ന വീടിനെ കാണാന്‍ വേണ്ടി 

പുറത്തേക്കോടും.. ഇടമുറിയാതെ വീഴുന്ന 

മഴത്തുള്ളികള്‍ മേല്‍ക്കൂരയിലൂടെ ഒലിച്ച്  താഴേക്ക് വീഴുമ്പോള്‍ കുളികഴിഞ്ഞ് മുടി തോര്‍ത്തുന്ന അമ്മയെപ്പോലെ അവന് തോന്നും.. 

അപ്പുവിനോര്‍മ്മയുണ്ട്.. 

അമ്മയുടെ മടിയില്‍ തലവെച്ച് കിടക്കുമ്പോള്‍ 

ഇടക്കിടെ നീര്‍‍ത്തുള്ളികള്‍ മുഖത്ത് വീഴാറുണ്ട്.. 

'' എന്താമ്മേ വെള്ളം..? '' 

'' അത് മഴ പെയ്യണതാ മോനേ..'' 

'' നമ്മള് വീട്ട്നുള്ളിലല്ലേ.. പിന്നെങ്ങന്യാ മഴ കൊള്ളണേ..'' 

'' അത്.. അത് ഓട് പൊട്ടീട്ട് ചോരണതാകൂടാ....'' 

അന്നുമുതല്‍ എല്ലാ ചോര്‍ന്നൊലിപ്പുകളും 

അമ്മയുടെ കണ്ണീരാണ്.. അവിടെയെല്ലാം 

പാത്രങ്ങള്‍ വെച്ച് അമ്മയെ ഓര്‍ത്ത് അവനിരിക്കും.. 

അമ്മ പോയിട്ട് മാസങ്ങളായിരിക്കുന്നു.. 

എവിടെക്കാ അമ്മ പോയത്...? 

ഓര്‍മ്മയുണ്ട് ആ രാത്രി..

അപ്പുവിനെ അമ്മ തട്ടിവിളിച്ചു.. 

'' മോനേ.. എണീക്ക്.. നമുക്കൊരോടം വരെ പോണം..'' 

'' എങ്ങട്ട്ക്കാമ്മേ..? '' 

'' അതൊക്കേണ്ട്.. മോനെ അമ്മ കുളിപ്പിച്ച് തരാട്ടോ..'' 

പാതിരാത്രിയില്‍ തണുപ്പില്‍ തൊട്ടിയിലെ 

തണുത്ത വെള്ളത്തില്‍ കുളിച്ച് അപ്പു വിറച്ചു.. 

'' തണുക്കണമ്മേ.... '' 

പല്ലുകള്‍ കൂട്ടിയിടിച്ചു.. 

പുതിയ വസ്ത്രം അണിയിച്ച് അപ്പുവിന്റെ കയ്യും പിടിച്ച് അമ്മ ഇരുട്ടിലേക്കിറങ്ങി.. 

നല്ല നിലാവെട്ടം ഉണ്ടായിരുന്നു..

ചെടിപ്പടര്‍പ്പുകള്‍ താണ്ടി അവര്‍ നടന്നു. 

ചീവീടിന്റെ കരച്ചില്‍ കേട്ടപ്പോള്‍ അവന്‍ ചോദിച്ചു.. 

'' അവരെന്തിനാമ്മേ ഒച്ചയിടണേ..?'' 

'' അവര് കരയണതാ മോനേ..'' 

'' കോക്കൂനെ കണ്ടട്ടാ കരേണത്..?''

'' ഉം.. കോക്കൂനെ കണ്ടട്ടന്നെ.. ഈ ലോകത്ത് 

മുഴ്‌വേന്‍ കോക്കുവാ.. മോന് പേടീണ്ടോ..'' 

'' ഉ..ഉം.. ഇല്യ..'' 

''ന്തേ പേടീല്യാത്തത്..? ''

''അപ്പുന് അമ്മണ്ടല്ലോ.. പിന്നെന്തിനാ പേടിക്കണേ..'' 

അപ്പോള്‍ അമ്മ അവനെ വാരിപ്പുണര്‍ന്നു.. 

'' മോനേ.. അമ്മേടെ ചക്കരേ..'' 

അമ്മ പൊട്ടിപ്പൊട്ടിക്കരഞ്ഞു.. 

'' മോനേ.. അപ്പൂ..'' 

'' ന്താമ്മേ..?'' 

'' അമ്മ ഒര് സ്ഥലം വരെ പോകേണ്.. അപ്പൂനേം കൊണ്ട്വോവാന്നാ കര്തിയേ.. '' 

'' എങ്ങട്ടിക്ക്..? അപ്പൂം വരും..'' 

'' വേണ്ട.. അമ്മ പോയിട്ട് അവടെ അപ്പൂനുള്ള 

കളിപ്പാട്ടങ്ങളൊക്കെ ഇണ്ടോന്ന് നോക്കട്ടേട്ടോ... 

ചതിയന്മാര് ചെലപ്പ വാങ്ങീട്ട്ണ്ടാവില്യ... 

അതൊക്കെ ശരിയാക്കി വെച്ചട്ട് അപ്പൂനെ 

വിളിക്കാന്‍ വരാട്ടോ..'' 

'' അത്‌വരെ അപ്പു ഒറ്റക്കാവൂലെ..''

'' എങ്ങന്യാ ഒറ്റക്കാവണേ.. അപ്പൂന് കളിക്കാന്‍ 

ആണ്ണാര്‍കുഞ്ഞനില്ല്യേ... തത്തപ്പെണ്ണില്ല്യേ... 

മാഞ്ചോടില്ല്യേ.. കുയിലമ്മയില്ല്യേ..

കളിച്ച് തീരൂമ്പളക്കും അമ്മ വരൂല്ലേ..പിന്നെന്താ..''

''ന്നാലും അമ്മില്ല്യാണ്ടെ..'' 

അപ്പു ചിണുങ്ങി..

കൊടും ഇരുട്ടില്‍ അപ്പുവിനെ തനിച്ചാക്കി 

അമ്മ നിഴല് പോലെ മുന്നോട്ട് പോയി.. 

അപ്പു ചിവീടിന്റെ കരച്ചില്‍ കേട്ടുനിന്നു.. 

ഇടക്കെപ്പഴോ അവനവിടെ കിടന്നുറങ്ങി.. 

പിറ്റേന്ന് അപ്പുവിന് നല്ല പനിയായിരുന്നു.. 

അച്ചമ്മ നെറ്റിയില്‍ തുണി നനച്ചിട്ടത് മാത്രമേ 

ഓര്‍മ്മയുള്ളൂ.. അച്ഛമ്മ ഇടക്കിടെ തേങ്ങുന്നുണ്ടായിരുന്നു.. 

..ന്നാലും അമ്മ വരാന്ന് പറഞ്ഞിട്ട് അപ്പൂനെ പറ്റിച്ചതെന്തിനാ.. 

അമ്മ പോയോണ്ടല്ലേ അച്ഛന്‍ ഗീതാന്റിനെ കല്യാണം കഴിച്ചത്...? 

അമ്മയെ കാണണം.. 

പക്ഷേ എവിടെയാണ്.. അറിയില്ല.. 

അപ്പു കുറേ നോക്കി നടന്നിട്ടുണ്ട്.. 

ചീവിടിന്റെ കരച്ചിലും മൂങ്ങയുടെ മൂളലും വവ്വാലിന്റെ ചിറകടിയും ഒന്നും കേട്ടില്ല.. 

ശരിയാ..

രാത്രി മാത്രം തുറക്കുന്ന വഴിയല്ലേ  അത്..

അതാ പകലില്‍ ആ വഴി കാണാത്തത്...

രാത്രിയില്‍ അവനെഴുന്നേറ്റു..

അച്ഛമ്മ നല്ല ഉറക്കമാണ്..

ശബ്ദമുണ്ടാക്കാതെ കുളിമുറിയില്‍ പോയി 

തൊട്ടിയിലെ വെള്ളം കോരി കുളിച്ചു. 

കഴിഞ്ഞ ഓണത്തിന് അമ്മ വാങ്ങിത്തന്ന 

ട്രൗസറും ബനിയനും ധരിച്ചു. 

പുറത്ത് നല്ല നിലാവുണ്ട്.. അന്നത്തെ രാത്രിയുടെ ആവര്‍ത്തനം പോലെ തോന്നി. 

ഇരുട്ടിലൂടെ നടന്നു.. 

ചിവീടുകളുടെ കരച്ചില്‍ വീണ്ടും.. 

അപ്പു നടന്നു കൊണ്ടേയിരുന്നു..

സജദില്‍ മുജീബ്

വീട്-സജീവൻചെമ്മരത്തൂർ

സജീവൻചെമ്മരത്തൂർ

വീട്

ചോര

കാച്ചിക്കുറുക്കി

പണിത കൂര

ചിരി പതഞ്ഞ്..

ബ്ലേഡറുത്ത 

മാളിക

ഉമിത്തീയിൽ

വെന്ത് വെന്ത്...

സജീവൻചെമ്മരത്തൂർ

ആ മഴയില്‍ നനഞ്ഞ കൗമാരഭാവങ്ങൾ-പി.എ നൃപൻ ദാസ്

പി.എ നൃപൻ ദാസ് 

തിരുവനന്തപുരം ഗവണ്‍മെന്റ് സെക്രട്ടറിയറ്റിൽ അസിസ്റ്റന്റ് സെക്ഷൻ ഓഫീസർ.ശാസ്താംകോട്ട സ്വദേശി കൊല്ലം ഫാത്തിമ മാതാ നാഷണല്‍ കോളേജ് മുൻ ചെയർമാൻ.

ആ മഴയില്‍ നനഞ്ഞ കൗമാരഭാവങ്ങൾ

"ഞാന്‍ ഗന്ധർവ്വൻ. ചിത്രശലഭമാകാനും മേഘമാലകളാകാനും പാവയാകാനും
പറവയാകാനും മാനാകാനും മനുഷ്യനാകാനും
നിന്റെ ചുണ്ടിലെ മുത്തമാകാനും
ഒരു നിമിഷാർദ്ധം പോലും
വേണ്ടാത്ത ഗഗനചാരി....."

പാലപ്പൂവിന്റെ മണം കാറ്റില്‍ പടരുന്നു.

ചുവരിലെ കലണ്ടറിൽ ജനുവരി 24.

സൂര്യ സ്പർശമുള്ള പകലുകളോടും ചന്ദ്ര സ്പർശമുള്ള രാത്രികളോടും യാത്ര പറഞ്ഞ് ,

മലയാള സിനിമയുടെ ഗന്ധർവ്വൻ യാത്രയായിട്ട് ഇരുപത്താറു സൂര്യവർഷങ്ങൾ.

പദ്മരാജന് മരണമില്ല. ഗന്ധർവ്വൻമാർ ഭൂമിയിലേക്ക് ശിക്ഷിക്കപ്പെടുകയാണ് . ദേവശാപത്തിന്റെ ശിക്ഷയൊടുക്കാൻ വിണ്ണിൽ നിന്നും ഭൂമിയിലേക്കെത്തിയ ഏതോ

ഗന്ധർവ്വ കുമാരനാകണം പത്മരാജൻ .

കലർപ്പില്ലാത്ത കാമനകളുടെ നിത്യോപാസകരും ഒപ്പം വിചിത്ര സ്വഭാവികളുമായ മനുഷ്യരെ സൃഷ്ടിച്ച എഴുത്തുകാരനെ ഒരു ജനത അനുധാവനം ചെയ്യുന്നുണ്ടിവിടെ, ഇപ്പോളും ...

പത്മരാജനോളം ആഘോഷിക്കപ്പെടുകയും , ഒരു ഭ്രാന്ത് പോലെ ആസ്വാദകനെ

മയക്കുകയും ചെയ്ത മറ്റൊരു ലഹരി മലയാള സിനിമ അതിന്റെ ചില്ലു പാത്രത്തില്‍

പകർന്നിട്ടില്ല , നാളിതുവരെ .

എത്ര എഴുതിയാലാണ്

പത്മരാജനെന്ന ജീനിയസിനെപ്പറ്റി

ഒന്ന് പറഞ്ഞ് തുടങ്ങാന്‍ കഴിയുന്നത് ..?

തൂവാനത്തുമ്പികളിൽ കടൽത്തീരത്തെ ഫ്രയിമുകളിൽ പുന്നൂസ് കോണ്‍ട്രാക്ടറും

ക്ളാരയും ...

വലിയ വലിയ ചിരികളുടെ പൊട്ടിച്ചിതറലിൽ സ്ക്രീനിലെ നിറങ്ങൾക്കൊപ്പം , പുന്നൂസ് കോണ്‍ട്രാക്ടർ ജയകൃഷ്ണന്‍ ആയി മാറുന്നു ...

ഒറ്റപ്പുതപ്പിനുള്ളിൽ "പവിഴം പോൽ പവിഴാധരം പോൽ ...." എന്ന് പാടുന്ന സോളമനും സോഫിയയ്ക്കും മുകളിലേക്ക് വന്നു പതിക്കുന്ന മുന്തിരികൾ...

തിര കവർന്നു കൊണ്ടു പോയ ചെറുമകന്റെ തിലോദകമായി കടലിന്റെ ആഴങ്ങളിലേക്ക്

പോയ മൂന്നാം പക്കത്തിലെ മുത്തശ്ശൻ ...

പാത്രക്കടയിലെ അദ്ഭുത ലോകത്തിനും അതിനു പുറത്തെ ആസക്ത

ജീവിതത്തിനുമിടയിൽ പകച്ചു പോയ കള്ളൻ പവിത്രൻ ...

മാളുവമ്മയുടെ വേശ്യപ്പുരയുടെ വിചിത്ര സമസ്യകളിൽ പതറുന്ന 'അരപ്പട്ട കെട്ടിയ

ഗ്രാമത്തിലെ' സക്കറിയയും ഗോപിയും ബിലാലും.

മായയുടെ വിടർന്ന കണ്ണുകളുടെ അടിത്തട്ടിൽ നിന്ന് താന്‍ മാഞ്ഞു പോയിരിക്കുന്നു

എന്നറികെ വിദൂരതയിലേക്ക് ഒറ്റയ്ക്ക് കാറോടിച്ചു മറയുന്ന 'ഇന്നലെ'യിലെ നരേന്ദ്രൻ.

തിര വന്നു മൂടുന്ന കോവളത്തെ വന്യമായ അധോലോകത്തിൽ ഉത്തരം കിട്ടാത്ത

ചോദ്യമായി 'സീസണി'ലെ അങ്കിള്‍ ജീവന്‍ ...

അങ്ങനെ എത്ര എത്ര ഒർമ്മകൾ...

പെരുവഴിയമ്പലവും തൂവാനത്തുമ്പികളും ദേശാടനക്കിളികളും ഇന്നലെയും അരപ്പട്ട

കെട്ടിയ ഗ്രാമത്തിലും ഫയല്‍വാനും സീസണും അപരനും കൂടെവിടെയും

നൊമ്പരത്തിപ്പൂവും നവംബറിന്റെ നഷ്ടവും തിങ്കളാഴ്ച നല്ല ദിവസവും ....

പേരുകള്‍ അവസാനിക്കുന്നില്ല ...

ക്ളാരയും രാധയും സോഫിയും അടക്കമുള്ള സ്ത്രീ കഥാപാത്രങ്ങൾ

പുരുഷന്റെ നിയമങ്ങള്‍ തൊണ്ട തൊടാതെ വിഴുങ്ങുന്നവരായിരുന്നില്ല. അവര്‍

ഗോത്രത്തിന്റെ വിലക്കുകൾക്കു മേൽ സ്ത്രീ സ്വത്വത്തിന്റെ ഉഗ്ര ശക്തിയെ

കാട്ടിക്കൊടുത്തു. ദേശാടനക്കിളികളിൽ രണ്ടു കൂട്ടുകാരികള്‍ തെരുവിന്റെ സ്വാതന്ത്ര്യവഴികളിലേക്കാണ് ഒളിച്ചോടുന്നത്. തൂവാനത്തുമ്പികളിൽ ക്ളാരയുമതേ.

അവളുടെ വഴികൾ അവള്‍ നിശ്ചയിച്ചതാണ്. തന്നെ വഞ്ചിച്ച പുരുഷന്റെ ജീവന്‍ പ്രണയത്തിന്റെ ബലിത്തറയിൽ ഹോമിച്ച് നവംബറിന്റെ നഷ്ടത്തിലെ മീര വേറിട്ട പെണ്ണാകുന്നു. അഴകിലും മിഴിവിലും മാത്രമല്ല അകം നിറയുന്ന സ്വാതന്ത്ര്യേച്ഛയുടെ നുരകളിലും പത്മരാജന്റെ സ്ത്രീകള്‍ പുരുഷനെ മറികടക്കുന്നു.

സദാചാരത്തിന്റെ ശ്രീരാമ സങ്കൽപ്പങ്ങളെ പിന്നിലാക്കിക്കൊണ്ടാണ്, രണ്ടാനച്ഛനാൽ അപമാനിതയായ പെണ്ണിനെ "നിന്റെ ശരീരത്തെ മാത്രമേ അയാള്‍ക്ക് തൊടാൻ കഴിയൂ.. " എന്ന് പറഞ്ഞു കൊണ്ട് ടാങ്കർ ലോറിയിലേക്ക് വിളിച്ചു കയറ്റി ജീവിതത്തിന്റെ മുന്തിരിത്തോപ്പുകളിലേക്ക് ഓടിച്ചു പോകുന്നത്. പീഢിപ്പിക്കപ്പെട്ട പെണ്ണ് അടുത്ത സീനിൽ സ്വന്തം ജീവനൊടുക്കുന്ന സിനിമാ കാഴ്ചകളെ പത്മരാജൻ കീഴ്മേൽ മറിച്ചു. സീതയുടെ സദാചാരത്തിൽ സംശയാലുവായ പുരുഷ രാമന്‍മാരുടെ സദാചാര സംഹിതകൾക്കു മേലെ സോഫിയെ നെഞ്ചോട് ചേര്‍ത്തു പിടിച്ച സോളമന്റെ ടാങ്കർ ലോറി ചീറിപ്പാഞ്ഞു. മോഹന്‍ ലാൽ എന്ന താരശരീരം ഇന്ന് വരെ കാട്ടിയ ഏറ്റവും വലിയ ഹീറോയിസം അതായിരുന്നു.

രതിയും മൃതിയും ആയിരുന്നു പത്മരാജൻ സിനിമകളുടെ ശാരീരം

ഭ്രാന്തും അടങ്ങാത്ത സ്വാതന്ത്ര്യ ബോധവും കെട്ടഴിയുന്ന കഥാപാത്രങ്ങൾ ...

അവര്‍ മനുഷ്യൻ സൃഷ്ടിച്ച നിയമങ്ങളെ ചോദ്യം ചെയ്തു കൊണ്ടേയിരുന്നു ...

ആ മഴയില്‍ നനഞ്ഞ കൗമാര യൗവനങ്ങളും,

അവയുടെ അലയടങ്ങാത്ത സ്മൃതി ലഹരികളും പകർന്ന നിത്യ കാമുകാ ...

അനശ്വര സ്മരണകളുടെ ഈ ചെറു പാനപാത്രം സ്വീകരിച്ചീടുക ...

ചെവിയില്‍ മുഴങ്ങുന്ന ഒന്നു കൂടി മാത്രം പറഞ്ഞ് പൂര്‍ണമായും അപൂര്‍ണമായ ഈ കുറിപ്പ് ഇവിടെ അവസാനിപ്പിക്കട്ടെ ...

"നമുക്ക് ഗ്രാമങ്ങളില് ചെന്ന് രാപ്പാർക്കാം , അതികാലത്ത് എഴുന്നേറ്റ് മുന്തിരിതോട്ടങ്ങളില് പോയി മുന്തിരി വള്ളി തളിർത്തു പൂവിടുകയും, മാതളനാരകം പൂക്കുകയും ചെയ്തോ എന്ന് നോക്കാം, അവിടെ വച്ച് ഞാന് നിനക്കെന്റെ പ്രേമം തരാം...."

പി.എ നൃപൻ ദാസ്